دليل الاستعمال

كل شي تحتاج تعرفه، بترتيب ما راح تستعمله.

ما تحتاج تقرأه كله. اقرأ القسم اللي إنت بيه هسه — والباقي يبقى هنا لمن تحتاجه.

1. الدخول

ما عندك اسم مستخدم. تدخل برقم هاتفك.

  1. 1تكتب رقمك بصفحة الدخول.
  2. 2يوصلك كود بالواتساب على نفس الرقم.
  3. 3تكتب الكود — وهذا كل شي.

ما وصلك الكود؟ تأكد إن الرقم نفسه اللي عليه واتساب، وانتظر دقيقة قبل ما تطلب كود جديد. وإذا حطيت رمز لحسابك من الإعدادات، تگدر تدخل بيه بلا انتظار.

2. تجهيز المتجر

تفتح متجرك من صفحة «ابدأ مجاناً» باسمك ورقم واتسابك ويوصلك كود. بعدها ست خطوات قصيرة، كل خطوة بضغطات. وتلغرام ورمز الحساب تلقاهم بعدين بالرئيسية.

  1. 1

    متجرك وصفحتك

    اسم المتجر ورابطه، وحساب الانستغرام ونوع بضاعتك. تگدر تتخطاها وترجعلها بعدين من الرئيسية.

  2. 2

    شكلك

    اختار ثيم جاهز، وضيف شعارك وألوانك. تشوف التغيير قبل ما تنشره، وتبدّله وقت ما تريد من الستوديو.

  3. 3

    أول منتج

    صورة واسم وسعر — أو حط منتجات تجريبية تشوف بيها الشكل. المتجر ما ينفتح فاضي.

  4. 4

    التوصيل

    محافظتك، وأجرة التوصيل، ويا أي شركة تشتغل — أو «أوصّل بنفسي». بعدها تربط شركتك من صفحة التوصيل مرة وحدة، نتأكد من حسابك ويا الشركة قبل ما نحفظه، وتگدر تختار شركة لكل محافظة.

  5. 5

    واتسابك

    الرقم اللي يوصله الزبون إذا حب يحچي بدل ما يطلب. يطلع مملوء برقم تسجيلك، وتگدر تبدّله.

  6. 6

    شغلك

    كم طلب يجيك باليوم، وكم واحد يشتغل وياك، ومنين سمعت بينا. ثلاث ضغطات، وتگدر تتخطاها.

3. يومك مع مسار

بعد الإعداد، شغلك اليومي أربع محطات — وإنت تشتغل بوحدة منها بس.

1

الزبون يطلب

يفتح رابط متجرك من البايو، يختار، ويكتب اسمه ورقمه وعنوانه. بحث المناطق يغطي كل العراق فالعنوان يوصل صحيح.

2

يوصلك إشعار تلغرام

بالطلب كامل: شنو طلب، شكد، وين، ورقم الزبون. تگدر تتصل بيه من نفس الإشعار.

3

تأكد بضغطة

«تأكيد» أو «رفض». والتأكيد يخصم من مخزونك أوتوماتيك.

4

ينرفع لشركة التوصيل وحده

الطلب المؤكد يصير شحنة بحسابك بشركة التوصيل اللي تختارها لمحافظته، بلا نسخ ولصق. والزبون ياخذ رابط يتابع بيه طلبه، فتقل أسئلة «وين صار طلبي».

4. ليش منتجي ما يظهر بالمتجر؟

هذا أكثر سؤال ينسأل. الجواب دائماً واحد من هذي — ومسار يأشرلك بالداشبورد شنو مخفي وليش.

المنتج بلا صورة

المتجر ما يعرض منتج بلا صورة — بطاقة فارغة تضرّك أكثر ما تنفعك. ارفع صورة وحدة على الأقل ويظهر فوراً.

الكمية صفر

ما نعرض شي ما تگدر تبيعه. زد الكمية من «المنتجات ← المنتجات والمخزون».

الباقة: واحد من بنودها خالص

الباقة تظهر بس إذا كل منتجاتها متوفرة بالكمية المطلوبة. منتج واحد ناقص يخفي الباقة كلها. والباقة لازم تكون «مفعّلة» بعد.

قاعدة مختصرة

صورة + كمية = يظهر. أي شي ناقص من الاثنين = مخفي.

5. تبيع أكثر لنفس الزوار

زيادة الزوار تكلّف إعلانات. هذي أدوات ترفع بيها الطلبات من نفس الناس اللي داخلين أصلاً. (بعضها حسب باقتك.)

الباقات

تجمع كم منتج بسعر واحد أرخص من مجموعهم. أكبر طريقة ترفع بيها قيمة الطلب الواحد.

الكوبونات

كود خصم بحد استعمال وتاريخ انتهاء — للستوري أو لزبون رجع يشتري.

عجلة الحظ

تنطي الزبون المتردد سبباً يكمّل الطلب هسه بدل ما يطلع.

رحلة الزبون

تشوف منو دخل، منو وصل للسلة، ووين وقف. إذا الأغلب يقف بالعنوان، المشكلة بالعنوان مو بالسعر.

الدفع الإلكتروني

الزبون يدفع قبل التوصيل والفلوس تنزل بحسابك إنت بويل. أكبر أثره: رواجع أقل.

6. موظفوك

كل موظف يدخل برقمه هو، مو برقمك. ويشوف الشغل اليومي بس:

  • الطلبات: يشوف، يأكد، يتصل بالزبون
  • المنتجات والمخزون: يضيف ويعدّل
  • البيع المباشر بالمحل

ما يشوف: الحسابات، الأرباح، الإعدادات، المفاتيح، ولا يگدر يضيف موظفين. هذي إلك إنت وحدك.

7. إذا وقفت

راسلنا بالواتساب ووصّف شنو صار. إذا احتجنا نشوف لوحتك بعينا، نطلب إذنك أول — وكل دخول إلنا ينسجّل عدك.

راسلنا على واتساب