شروط الاستخدام

الاتفاق بيناتنا، بلغة تفتهمها.

كتبناها بنفس اللغة اللي نحچي بيها وياك. ماكو بند مخفي بالسطر الصغير.

1. منو يگدر يفتح متجر

مسار موجّه للتاجر اللي يبيع عبر الانستقرام أو فيسبوك داخل العراق. ما تحتاج سجل تجاري حتى تستعمل مسار نفسه.

  • رقم هاتف عراقي عليه واتساب — للدخول وللدعم.
  • للشحن بشركة توصيل: حساب بيها باسمك إنت (أو توصّل بنفسك).
  • للدفع الإلكتروني فقط (اختياري): حساب تاجر بويل باسمك.

الحساب شخصي. إنت مسؤول عن كل شي ينعمل من حسابك ومن حسابات موظفيك.

تگدر تفتح متجرك بنفسك من صفحة التسجيل — اسمك ورقم واتسابك واسم المتجر، وكود يوصلك على الواتساب — ويبدأ بالباقة المجانية. أو راسلنا ونفتحه إلك.

2. شنو يلتزم بيه مسار

  • نجهّز متجرك وياك بجلسة إعداد: منتجاتك، شعارك، ألوانك، والربط.
  • متجرك على اسمك.masar.dabta.app — أو دومينك الخاص بالباقة المتقدمة.
  • ما نستلم ولا نحتجز أي مبلغ من مبيعاتك: الدفع الإلكتروني ينزل بحسابك بويل، والدفع عند الاستلام يمشي بحسابك بشركة التوصيل.
  • مفاتيحك تُحفظ مشفّرة، وما تنعرض كاملة بعد الحفظ.
  • بياناتك منفصلة عن كل تاجر ثاني.
  • إذا احتجنا ندخل لوحتك للدعم، ندخل بصلاحياتك وكل دخول ينسجّل.

3. شنو تلتزم بيه إنت

  • منتجاتك وأسعارك وأوصافك مسؤوليتك، ولازم تكون قانونية وصحيحة.
  • المفاتيح اللي تربطها تكون لحساباتك إنت فقط.
  • إذا شغّلت الدفع الإلكتروني وطلب مدفوع ما انسلّم، ترجّع المبلغ للزبون خلال 72 ساعة — ناقص أجرة التوصيل إذا كان الزبون هو السبب.
  • دفع الاشتراك بموعده، أو تحچي وياّنا إذا عندك ظرف.

ممنوع تستعمل مسار لبيع شي مخالف للقانون العراقي، أو لإرسال رسائل لناس ما طلبوها.

4. الاشتراك والدفع

  • الباقة المجانية: أول 14 يوم تجربة بكل الميزات، بعدها 10 طلب مؤكَّد بالشهر، ورسائل الواتساب والتحقق والقراءة الذكية بالباقات المدفوعة.
  • الباقات المدفوعة تُدفع لثلاثة أشهر مقدماً أو أكثر، وأسعارها منشورة بالموقع وبصفحة الاشتراك.
  • الدفع برابط ويل أو كاش أو تحويل بالتنسيق.
  • ما اكو تجديد تلقائي من بطاقتك — كل تجديد رابط جديد توافق عليه إنت.
  • الترقية بنص الفترة تبدأ فوراً وأيامك الباقية تنخصم من سعرها؛ والتنزيل لباقة أقل يصير لما تخلص فترتك المدفوعة.
  • المتاجر اللي انفتحت قبل ما نطلق التسجيل الذاتي تبقى على حدّها المحفوظ 20 طلب مؤكَّد بالشهر، وتجربتها تخلص بموعدها المحفوظ — الحد الجديد للمتاجر الجديدة بس.

ضمان الشهر الأول: إذا ما عجبك مسار خلال الشهر الأول من اشتراكك المدفوع، نرجّعلك المبلغ كاملاً. تطلبه بالواتساب وخلص.

التأخر: عندك 7 أيام سماح والمتجر شغّال. بعدها يتوقف عرض المتجر للزبائن فقط — لوحتك وبياناتك تبقى مثل ما هي، والدفع بأي وقت يرجّع كل شي خلال دقائق.

5. بياناتك ملكك

  • بياناتك إلك بأي وقت: تنزّل طلباتك وزبائنك ومنتجاتك ومخزونك بنفسك من الإعدادات، أو كلها بملف واحد — مو بس عند المغادرة.
  • عند الإلغاء: المفاتيح تنمحي فوراً، والمتجر يتوقف عن العرض.
  • بياناتك تبقى 90 يوماً إذا غيّرت رأيك (أو 7 أيام إذا طلبت المحو المبكر)، وبعدها تنمحي نهائياً.

تفاصيل أكثر عن أي بيانات نخزن وليش، بصفحة الخصوصية.

6. الخدمة والانقطاع

نشتغل حتى يبقى مسار شغّال على مدار الساعة، بس ما نگدر نوعد بصفر انقطاع — مسار يعتمد على خدمات غيرنا (شركات التوصيل، ويل، تلغرام، واتساب) وأي وحدة منها تگدر تتأخر.

إذا صار انقطاع طويل من طرفنا، نعوّضك بتمديد اشتراكك بنفس المدة.

ما نتحمّل خسارة أرباح أو أضرار غير مباشرة. أقصى مسؤولية علينا بأي حال هي ما دفعته باشتراكك آخر ثلاثة أشهر.

7. إنهاء الحساب

تگدر تلغي بأي وقت بلا سبب وبلا رسوم — بنفسك من «الإعدادات ← حسابك وبياناتك»، أو راسلنا بالواتساب.

نگدر نوقف حساباً يخالف هذي الشروط (بيع ممنوع، ضرر للزبائن، أو استعمال مفاتيح مو إلك). نبلّغك بالسبب، وإذا الوقف مو بسبب مخالفة واضحة نرجّعلك ما تبقى من اشتراكك.

8. تغيير الشروط

أي تغيير نبلّغك بيه قبل تطبيقه بـ30 يوماً على الأقل، بشريط بالداشبورد وبالواتساب. إذا ما عجبك التغيير، تگدر تلغي وناخذ منك بس المدة اللي استعملتها.

هذي الشروط تخضع للقانون العراقي.