الخصوصية

شنو نعرف عنك، وشنو ما نعرفه.

مسار ما يبيع بيانات ولا يتاجر بيها. هذي القائمة الكاملة لكل شي نخزّنه ولوين يطلع.

1. المبدأ

مسار أداة تشتغل بيها، مو شركة تجمع بيانات. ما نبيع بياناتك ولا بيانات زبائنك لأي جهة، وما نستعملها لإعلانات، وما ندرّب عليها أي شي.

بيانات زبائنك هي بياناتك إنت. إحنا نخزّنها نيابة عنك حتى متجرك يشتغل، وإنت صاحبها.

2. شنو نخزّن عنك إنت (التاجر)

  • رقم هاتفك واسمك — للدخول وللتواصل.
  • أكواد الدخول اللي ترسل لواتسابك، وتنتهي بعد دقائق.
  • رمز حسابك محفوظ مشفّراً بطريقة ما تخلينا نعرفه — نتأكد منه بس.
  • جلسات دخولك: وقتها والجهاز، حتى تگدر تشوف منو داخل لحسابك وتطلعه.
  • محتوى متجرك: منتجاتك، أسعارك، صورك، باقاتك، ومخزونك.
  • مفاتيح شركات التوصيل وويل ورقم واتساب الأعمال إذا ربطته — مخزونة مشفّرة، وما تنعرض كاملة بعد ما تحفظها ولا لإلنا.

3. إذا فتحت متجرك بنفسك

  • اللي تكتبه بصفحة التسجيل: اسمك ورقم واتسابك واسم المتجر ورابطه، وكود الدعوة ومصدر الزيارة (مثل الإعلان اللي جابك) إذا موجودين.
  • أجوبة أسئلة الإعداد اللي تختار تجاوبها — الانستغرام، الصنف، الحجم، التوصيل، ومنين سمعت بينا. كل سؤال تگدر تتخطاه.
  • رسائل الواتساب عن حسابك (الترحيب، وقرب نهاية التجربة) تجيك من رقم «ضبطة» — الشركة اللي وراء مسار.
  • النصايح والعروض بالواتساب بس إذا اخترتها بنفسك بصفحة التسجيل (مطفية من الأساس)، وتوقفها بأي وقت إذا رديت بكلمة «توقف».
  • «حجاي» — مساعد ضبطة اللي يرد على رسائل رقمها — يشوف بس مرحلة تسجيلك واسمك واسم متجرك وباقتك والخطوة الجاية. ما يشوف طلباتك ولا زبائنك ولا حساباتك.
  • لما ينفتح متجر جديد، أو تضيف أول منتج، أو يجيك أول طلب مؤكَّد، أو تطلب تحچي ويا واحد من فريقنا، أو كود التسجيل ما يوصل، يوصل تنبيه لفريق مسار على تلغرام: اسمك واسم المتجر ورابطه، ورقمك بس إذا الكود ما وصلك (حتى نتواصل وياك ونفتحه إلك)، وآخر 4 أرقام منه إذا طلبت تحچي ويانا.
  • إذا ما كمّلت التسجيل وما انفتح متجر، بياناته تنمحي بعد 90 يوماً من آخر مرة تحرّكت بيه. وإذا انمحى متجرك نهائياً، بيانات تسجيلك الشخصية تنمسح وياه.

4. شنو نخزّن عن زبائنك

بس اللي يحتاجه الطلب حتى يوصل:

  • اسم الزبون ورقم هاتفه.
  • عنوانه: المحافظة والمنطقة وتفاصيل العنوان.
  • محتوى الطلب وسعره وحالته.
  • رسائل الواتساب اللي انرسلت إله عن طلبه: نوعها ووقتها وهل وصلت.
  • إذا وافق بنفسه على «ذكّرني إذا ما كمّلت»: رقمه وملخص سلته، لتذكير واحد.
  • إحصاءات زيارة المتجر: منو دخل، منو وصل للسلة، ووين وقف — تنعرض إلك كأرقام مجمّعة.
  • وسوم وملاحظة تكتبها إنت عن زبونك بقسم العملاء — تنمحي وياه إذا محيته.
  • إذا قيّم الزبون منتج بعد ما وصله طلبه: نجومه وتعليقه، وتنشر باسمه الأول بس بعد ما إنت توافق — وتنمحي وياه إذا محيته.
  • رأي الزبون بعد التوصيل من واتساب: الزر اللي ضغطه (ممتاز، زين، عندي مشكلة) ورسالة وحدة يكتبها بعده — توصل إلك بس، ما تنشر، وتنمحي وياه إذا محيته.

ما نجمع أكثر من هيك: ماكو تتبّع عبر مواقع ثانية، وماكو كوكيز إعلانية، وماكو بيع لقوائم.

الكوكيز: متجرك ما يحط كوكيز إطلاقاً — سلة الزبون وعدّاد زيارة داخلي ينحفظون بجهازه نفسه، ويطلع إله شريط يوضّح هذا أول مرة. لوحتك تستعمل كوكي دخول وحدة بس.

5. لوين تطلع البيانات

هذي الجهات بس، وكل وحدة تاخذ أقل شي تحتاجه، وبس إذا شغّلت الميزة اللي تحتاجها:

  • شركة التوصيل اللي تربطها (الوسيط، مدن، المجمّع، برايم…) — اسم الزبون ورقمه وعنوانه ومحتوى الطلب، حتى تنعمل الشحنة. تنرسل بحسابك إنت عندهم، فالشحنة باسمك. برايم: حسابك عندهم نفتحه إحنا من تربطها، فياخذون اسم متجرك ورقمك وعنوانه.
  • ويل — مبلغ الطلب ورقمه لتوليد رابط الدفع، إذا شغّلت الدفع الإلكتروني. الفلوس تنزل بحسابك مباشرة.
  • أرقام — رقم الهاتف فقط، لإرسال كود التحقق بالواتساب (إلك، أو لزبونك إذا شغّلت تحقق الطلبات).
  • ميتا (واتساب للأعمال) — رقم الزبون واسم متجرك وتفاصيل طلبه، لرسائل الطلب («استلمنا طلبك»، «طلبك بالطريق») من رقم مسار أو رقمك.
  • Anthropic (نموذج Claude) — نص رسالة الزبون اللي تلصقها بنفسك بـ«اقرأ الرسالة» بس، حتى تنقرا كمسودة طلب. حسب شروطهم ما تنستعمل لتدريب نماذجهم.
  • تلغرام — تفاصيل الطلب، لإشعار البوت اللي إنت ربطته.

ما اكو طرف غيرهم. إذا احتجنا نضيف واحد، نحدّث هذي الصفحة ونبلّغك بالداشبورد قبل.

6. منو يشوف بياناتك

  • إنت وموظفوك — كل واحد حسب صلاحيته. الموظف يشوف الشغل اليومي بس، ما يشوف حساباتك ولا مفاتيحك.
  • فريق دعم مسار — عند الحاجة فقط، ولحل مشكلة طلبتها إنت.

كل دخول من فريق الدعم للوحتك ينسجّل: منو دخل وامتى. ما ندخل لحسابك بلا سبب، وما نگدر نشوف رمز حسابك ولا مفاتيحك الكاملة.

متجرك معزول: أي تاجر ثاني ما يشوف ولا صف من بياناتك.

7. شكد تبقى البيانات

  • أكواد الدخول: دقائق، وبعدها تنتهي.
  • جلسات الدخول: تنتهي وحدها، وتگدر تطلعها بأي وقت.
  • بيانات متجرك وطلباتك: ما دام حسابك شغّال.
  • عند الإلغاء: المفاتيح تنمحي فوراً، وباقي البيانات تبقى 90 يوماً إذا غيّرت رأيك، بعدها تنمحي نهائياً (أو بعد 7 أيام إذا طلبت المحو المبكر).
  • النسخ الاحتياطية اليومية تنمسح وحدها بعد 14 يوماً، فبعد المحو ما تبقى نسخة أقدم من أسبوعين.
  • اللي يبقى بعد المحو: فواتير اشتراكك وياّنا (سجلنا المالي) وسجل دخول فريق الدعم — بلا بيانات متجرك ولا زبائنك.

8. حقوقك

  • تنزّل طلباتك وزبائنك ومنتجاتك ومخزونك بنفسك من «الإعدادات ← تصدير بياناتك»، ملفات تفتح بإكسل — أو كل بياناتك بملف واحد من «الإعدادات ← حسابك وبياناتك».
  • تطلب تصحيح أي بيان غلط.
  • تلغي حسابك بنفسك من «الإعدادات ← حسابك وبياناتك»، وتختار المحو المبكر (7 أيام) بدل الـ90 يوم.
  • تسحب أي ربط (شركة التوصيل، ويل، تلغرام، رقم الواتساب) وقت ما تريد — المفتاح ينمحي عدنا.

بالنسبة لزبائنك: إذا زبون طلب منك محو بياناته، تمحيه بنفسك من «الإعدادات ← حسابك وبياناتك»: اسمه ورقمه وعنوانه ينمسحون من كل مكان، والطلب يبقى بمبلغه بس بلا هويته.

9. الحماية

  • كل الاتصال مشفّر (HTTPS).
  • المفاتيح الحساسة مخزونة مشفّرة، لا نصاً صريحاً.
  • رموز الحسابات محفوظة بطريقة ما ترجع لنص.
  • تحقق ثنائي اختياري: الدخول يحتاج رمزك وكود واتساب.
  • نسخة احتياطية يومية لقاعدة البيانات.

ما اكو نظام مضمون 100%. إذا صار خرق يمسّ بياناتك، نبلّغك بأسرع ما نگدر ونگلك بالضبط شنو انكشف وشنو سوّينا.

10. التواصل

أي سؤال أو طلب يخص خصوصيتك: راسلنا على واتساب المبيعات المذكور بالموقع، ونرد عليك.

إذا غيّرنا هذي السياسة، نبلّغك بشريط بالداشبورد قبل التطبيق.